சுயநலப் பாடங்கள் - தாராபாரதி

by **அ.இராமநாதன்** on Mon Apr 23, 2012 12:51 pm

-
எங்கள் வீட்டுக் கூடங்கள் - அதில்
எங்கும் சுய நலப் பாடங்கள்
எங்கள் ரத்த நாளங்கள் - அதில்
எத்தனை குப்பைக் கூளங்கள்?
-
அடுத்த வேளைச் சோற்றுக்கு
அமைச்சர் பின்னால் சுற்றியவன்
அடுக்கு மாடி உணவகம் கட்டி
ஆகாயத்தைத் தொடுகின்றான்!
-
மாற்றுக் கட்டு வேட்டியின்றி
சோற்றுக் கட்சி தொடங்கியவன்
நேற்று தொட்டு நவீனமயமாய்
நெசவாலைகளைத் திறக்கின்றான்!
-
கருங்காலிக்குக் கூட இங்கே
கௌரவமான நாற்காலி,
முருங்கை மரத்து முக்காலிக்கும்
முண்டியடிக்கிற கைக்கூலி!
-
எங்கும் எதிலும் சுருட்டல்கள்,
எல்லாம் சில்லறை திரட்டல்கள்!
பங்குச் சந்தைக் கொள்கைகளில்
பாரதம் கூறு போடுகிறார்!
-
============================
>தாராபாரதி
நன்றி: தாராபாரதி கவிதைகள் (நூல்)